Benvida do Presidente
Saúdo do Presidente da Xunta, D. Manuel Fraga
Iribarne
Coa emoción propia de quen se interna por primeira vez nun mundo
apaixonante, escribo estas liñas, como quen escribe no aire, a xeito de
benvida a quen decidira asomarse á realidade de Galicia a través desta
fiestra electrónica.
É
a nosa unha pequena comunidade española, periférica e marítima, dique da
Europa atlántica, meta do Camiño de Santiago, que forxou a súa identidade
ó longo dos séculos sobre a base dunha lingua e unha cultura propias.
Somos os galegos un pobo que desbordou os seus límites nunha inxente
crecida humana que levou a galeguidade ata os máis arredados confíns do
planeta.
Somos un país orgulloso do propio, pero á vez aberto e
cosmopolita, que a través da historia fixo da tolerancia e o entendemento
pedras angulares da súa armazón
social.
A
Galicia de hoxe aposta, como sempre, por conserva-lo mellor da súas
tradicións, pero proxectándose decididamente cara á modernidade. Para iso
veu realizando nos últimos anos un considerable esforzo político,
económico e social, centrado na mellora e ampliación das súas
infraestructuras básicas, de maneira moi especial no eido das tecnoloxías
da comunicación, desde o convencemento de que constitúen o medio máis
eficaz para acadar un verdadeiro avance
social.
Queremos estar na avanzada da sociedade da información e cada día
damos un novo paso cara ese horizonte de futuro. A través das páxinas que
seguen, quen o desexe poderá ir tendo cumprida noticia diso, e ademais
poderá coñece-las iniciativas coas que entre todos, tanto desde o ámbito
público coma desde o privado, estamos a construír a Galicia do terceiro
milenio.
©
Xunta de Galicia
Información mantida polo Gabinete de
Comunicación
Secretaría Xeral para as Relacións cos Medios
Informativos
Correo electrónico: gabinete
xunta.es